Segredu Importante Sira Ne'ebe Mundo Hakerek Konaba Bispo Alberto

Dom ALberto Ricardo da Silva

Dili, Bispo Alberto Ricardo da Silva, moris iha Aileu iha loron 24 Abril 1943 no husik i’is iha Hospital Nasional Guido Valadares (HNGV) iha loron 2 Abril 2015, ne’ebe mate ho idade tinan hitu nulu resin ida (71 anos). Tuir mai ne’e segredu importante sira ne’ebe mundo hatene no hakerek konaba Eis Bispo Diosece Dili ne’e.

Bispo Alberto ordena ba dahuluk hanesan Amo lulik iha loron 15 Augusto 1972 ho idade tinan rua nulu resin sia (29 anos) no Papa Joao Paulo Segundu (II) nomeia ba Bispo Diocese Dili nian iha loron 27 Febreiru 2004 no simu ordenasaun episkopal iha loron 2 Maiu 2004, ho idade tinan ne’en nulu resin ida (61 anos).

Papa Joao Paulo II ne’ebe nomeia Bispo Ricardo mate iha loron 2 Abril 2005 iha Roma, Italia, no liu tiha tinan sanulu (10), Eis Bispo Diocese Dili ne’e mate mos iha loron ne’ebe hanesan (2-Abril).

Hanesan haktuir iha portal VATICAN INSIDER nian, Papa Joao Paolo II mate iha tuku 8;27 kalan oras Italia nian, no tuir mos publikasaun ne’ebe Padre Martinho Gusmao (Padre Paroku Municipiu Manatuto) publika katak Amo Bispo Ricardo mos mate iha oras ne’ebe hanesan (8;27 kalan Oras Timor Leste).

Husi Portal Database Catoliko husi Diocese Asia nian (UCAN NEWS) fo sai katak bainhira sei sai hanesan Amo Lulik ou Padre ba Diocese Dili, Bispo Ricardo nu’udar amo lulik ida ne’ebe dedikadu tebes no tau nia an iha risku iha luta Timor nian ba ukun rasik an.

“Iha Novembru 1991, Amo Ricardo mak lidera misa ba Saudoso Sebastiao Gomes ne’ebe Militar Indonezia nian oho, no bainhira mosu tiha Masakre Santa Cruz ne’ebe hamate jovem no labarik na’in atus rua lima nulu resin (250 pesoas liu), Amo Ricardo nia vida hetan kedas ameasa oin oin husi tropas Indonezia inklui hateten Amo da Silva hanesan “Mastermind” ba masakre nian” Hakerek portal UCAN NEWS hanesan CJITL asesu.

Liu tiha fulan balun, Vaticano deside hodi haruka sai husi Dili, Amo Ricardo hodi ba tuir estudo teologia klean liu tan iha Roma hanesan mos dalan hodi proteze Amo Alberto husi ameasas tropa Indonezia nian no foin fila mai Timor tinan hirak liu tiha.

Segredu diak seluk ne’ebe mundo hakerek maka, haktuir iha Wikipedia katak, liu tiha tinan ida ho balun, Amo Ricardo ordena tiha ba Bispo Diocese Dili, tuir mai iha loron 5 Dezembru 2005, Bispo Timor oan ne’e hakerek kedan karta ida ba Sekretariu Jeral ONU, Kofi Annan hodi husu atu establese Tribunal Internasional tuir Artigu 7 husi Rezolusaun ONU hodi halo julgamentu ba autor krime Indonezia nian ne’ebe viola direitos humanos iha durante funu okupasaun Indonezia nian.

Maske nune’e liu tiha tinan rua (2) husi karta ba Kofi Annan, Bispo Ricardo rasik iha homilia ida iha Igreja Katedral Dili iha loron 1 Abril 2007 husu atu Timor oan hotu perdua nia inimigu sira hodi nune’e bele lori dame ba isin no klamar nian.

Iha Febreiru 2015, Bispo Ricardo husu Rejignasaun ba nia servisu iha Diocese Dili ho razaun saude no ikus mai hetan aseitasaun husi Papa Francisco iha Vatikanu, Roma iha loron 9 Febreiru 2015.

Bispo Ricardo hahu hetan tratamentu intensivu  iha Novembru 2014 ho sofre moras Matan no Ulun no konsege halo tratamentu iha Ospital  Royal-Darwin Australia, no tuir mai transfere ba fali iha Ospital Flinders Adelaide, Australia ba operasaun.

Iha Fulan Marcu 2015, Bispo Ricardo kontinua hikas fali tratamentu intensivu iha Hospital Nasional Guido Valadares – HNGV, Dili no hakotu i’is iha Ospital ne’e iha loron 2 Abril 2015 horas tuku 8;37 kalan Oras Timor Leste. Autor ba artigu ne’e hamutuk ho Crew CJITL hato’o ami nia kondolensia profunda ba Matebian Bispo Alberto Ricardo da Silva. #RIP. (*Vatican Insider/UCAN NEWS/Wikipedia/CJITL)

www.sapo.tl